حواسي مقدسة

كنيسة ماربولس بالبساتين

(اسكتش حواسي مقدسة)

يدخل الطفل مينا ممسكاً هاتفه ويلعب به ويظهر عليه الفرح الشديد

الراوي:النهاردة مينا صاحبنا معملش أي حاجة مهمة لا ذاكر ولا صلي لربنا ولا راح الكنيسة ولا رتب اوضته ولا سمع كلام مامته..وكمان كان طول ماهو ماشي في الشارع كان عمال يغني ويقول اغنية مش حلوة..وكمان فضل سهران كتير اوي لحد ما عينه وجعته من التليفزيون تعالوا نشوف بقي بقيت القصة...

مينا:اه انا تعبان ومحتاج ارتاح شوية علشان اقوم اكمل لعب...ينام مينا..

تدخل العين:ايه ده هو مينا صاحبي نام ؟؟..طيب كويس علشان احكيلكم يا صحابي علي مينا والي بيعمله معايا خلوني اعرفكم بنفسي انا العين الي بيشوف بيها وانا الي رشمني ابونا وقت المعمودية بزيت الميرون علشان اكون مقدسة..بس مينا بيستخدمني غلط بيقعد قدام الكمبيوتر كتير وده بيتعبني...بيقعد قدام التليفزيون كتير وده بيأثر عليا..مع اني المفروض انه يقعد يقراء بيا الكتاب المقدس ويعرف رسايل ربنا لينا علشان حياته تبقي كويسة ويعرف تعاليم ربنا المهمة الي من غيرها منقدرش نعيش...والمفروض يقراء بيا الكلام الي بياخده في المدرسة علشان يبقي شاطر ويكون انسان كويس ويفيد نفسه والي حواليه..بس هو مبيعملش كده خالص..وكمان احياناً يعني بيبص لصحابه انهم اقل منه واني هو احسن منهم..وبيبص للمحتاجين والغلابة الي ربنا قالنا نساعدهم ونقف معاهم بصة مش حلوة..هو بيبصلهم بصة وحشة وانه افضل منهم..بجد انا زعلانة من مينا ونفسي يبطل كل الحاجات الوحشة دي ويقراء في الانجيل ويذاكر دروسه..وكمان يستخدمني يشوف بيا الي محتاج مساعدة او خدمة ويروح يساعده....

تخرج العين وتدخل الأذن:اه اه اه خلاص مش قادرة انا بجد تعبانة جداً ومحتاجة اروح للدكتور علشان اتعالج..انا تعبت من كتر الأغاني الكتيرة الي بيسمعها مين بيا..والأغاني دي صوتها عالي ووحشة جداً وبتخليني احتاج كل شوية علاج خلوني يا صحابي احكيلكم قصتي

انا بقي مشكلتي كبيرة مع مينا بدايتي لما جيت الدنيا هنا وكان مينا لسه صغير وابونا رشمني ورشم جسم مينا كله بزيت الميرون..والمفروض والصح انه يسمع بيا كلام ربنا وكلام ابونا وكلام بابا وماما واي كلام صح بيفيده..بس هو مبيعملش كده..وكمان لما بيبقي ماشي في الشارع بيقعد يسمع الاغاني الوحشة الي بتبقي شغالة..وانا بحاول دايماً اخليه يبطل يعمل كده بس مش بعرف خالص..انا بجد نفسي مينا يستخدمني صح يسمع بيا الترانيم الحلوة يسمع بيا الالحان يسمع بيا الصلاة في كل حين والصلاة في القداس والالحان الجميلة الي بيقولها ابونا والشمامسة والشعب يرد عليهم..انا بجد زعلانة جداً ونفسي مينا يصلح من نفسه ويستخدمني صح زي ما ربنا يسوع المسيح وصانا...واكيد هو لما يعمل كده ويسمع الحاجات الكويسة دي هتكون حياته احسن من دلوقتي..

تخرج الأذن ويدخل اللسان:ازيكم عاملين ايه ؟؟ طبعاً انتوا دلوقتي مبسوطين علشان كويسين ومش تعبانين ومش محتاجين تروحوا للدكتور..يتحدث اللسان بحزن:انما انا بقي تعبان اوي وعايز اروح للدكتور علشان اتعالج من الي انا فيه..لان مينا مش بيسمع كلام مامته وباباه واحياناً بيرد عليهم بيا بطريقة مش حلوة..وبيزعلهم منه..وكمان في الكنيسة بيرد علي الخدام بتوعه وعلي صحابه ردود مش صح..وبيخلي كل الناس تزعل منه..وكمان في مشكلة اكبر واكبر..اني مينا مش بيرضي ياكل الأكل الصحي الي مامته بتعملهوله علشان يقوي ويفيد جسمه وطول اليوم يشرب في عصاير وبيبسي وياكل شيبسي وبوزو لحد ما انا تعبت خلاص ومبقتش قادر استحمل ..

انا بتمني من ربنا اني مينا يستخدمني صح في حياته..يقراء بيا كلام الانجيل وكلام ربنا علشان الودن تسمعه وكل الجسم يتقدس..بتمني اني مينا يشترك في الكورال بتاع الكنيسة وهو صوته كويس اوي اوي ويقف ويقول ترانيم معاهم..حاولت كتير اقنعه اني صوته كويس والاحسن يرنم بيا ويبطل يغني بس هو كان دايماً بيرفض ده..اه ياني اه ياني لا انا مش قادر انا هروح للدكتور باي باي...

يخرج اللسان وتدخل الانف:انا الانف كل الي نفسي فيه حاجة صغيرة اد كده(تشير بيدها الي صابعها لتؤكد صغر ماتريده)

والحاجة دي هي اني مينا صاحبي يستخدمني في شم الروايح الذكية عارفين يعني ايه الذكية يا ولاد ؟؟

يعني الروايح الكويسة زي مثلاً ريحة البخور وريحة الزهور واي ريحة كويسة..لاني بصراحة تعبت لاني مينا بعيد عن الكنيسة ومش بيشم بيا بخور ولا حتي بيشم بيا زهور بس هو ده كل الي نفسي فيه باي باي بقي..تخرج الانف في شكل كوميدي...

ويدخل الكف:انا بقي كف مينا والي المفروض يستخدمني بشكل كويس يعني مثلا يمسك بيا الانجيل يساعد بيا باباه ومامته وممكن كمان ينضف في الكنيسة ويساعد صحابة ويساعد الخدام..وممكن كمان يمسك بيا كتب المدرسة ويذاكر علشان يكون شاطر وناجح في حياته..انا الايد الي بلمس كل حاجة بيشوفها مينا في يومه..وانا ربنا خلقني في جسم مينا علشان كل الحاجات الحلوة الي قولتها فوق دي..بس للأسف هو مبيعملش ولا حاجة منهم خاااااااااالص..عارفين بيعمل بيا أيه؟؟ هقولكم اولاً بيرمي بيا كياس الشيبسي والكيك والحاجات الحلوة في الكنيسة..وكمان احياناً بيهزر هزار تقيل وبيزعل بالهزار ده صحابة وقرايبة..وكمان بيقعد يلعب احياناً في الارض والطين وانا بتعب من الحاجات دي وبحتاج اروح للدكتور علشان اخف...حاولت كتير اكلم مينا واقنعه اني يستخدمني ويستخدم كل الحواس دي الي شفتوها كلها يا

صحابي صح بس هو دايماً مش بيسمع كلامي وبيعمل عكسه خاااالص...وانا وكل الحواس زعلانين بس كل يوم بنصليله وبنطلب من ربنا يسوع المسيح انه ينور عقله ويخليه يعرف يستخدمنا صح لاني ابونا رشمنا بزيت الميرون في المعمودية والمفروض اننا وكل جزء في جسمه نكون مقدسين..

تخرج الايد..

يتحدث الراوي:للأسف كل الحواس زعلانة من مينا لكن رغم كده بيصلوله تفتكروا ايه الي ممكن يحصل دلوقتي..تعالوا نشوف مع بعض...

يقوم مينا من نومة ويبدأ في حساب نفسه قائلاً:معقولة الحلم الي انا شوفته ده صح ؟؟ معقولة ولا ده حقيقي؟؟ معقولة كل الحواس الخمسة بتوعي زعلانين مني بالشكل ده هو انا وحش للدرجادي ؟؟

طب ياتري في فرصة اتغير ولا هفضل طول عمري كده...انا فعلاً كنت غلطان..ولازم اتغير بس اول حاجة لازم اصالح الحواس بتاعتي علشان هما زعلانين مني اوي..وانا لازم اكون مقدس وحواسي تكون مقدسه لاني ربنا خلقني كده وابونا دهني بزيت الميرون وحطه علي كل حاسة من حواسي علشان اكون كويس وناجح في حياتي الروحية والعملية ومضايقش حد مني بالاخص الحواس....انا لازم ابطل كل الحاجات الوحشة الي كنت بعملها دي واستخدم كل حاجة ربنا مديهاني صح...

ينده مينا :ياحواس تعالوا انا عايز اعتذرلكم..تدخل الخمس حواس ويعتذر لهم مينا عما صدر منه...وتنتهي المسرحية بترنيمة مناسبة...

jesushome777

اضف تعليق

الاثنين، 22 أكتوبر 2018